اسلام آباد میں مبینہ پولیس مقابلہ، دودھ فروش جاں بحق

 

اسلام آباد میں مبینہ پولیس مقابلہ، دودھ فروش جاں بحق

فائر کرنے پر پولیس کو چیخ کربتایا کہ ڈاکو نہیں پھر بھی فائرنگ جاری رہی، لواحقین

وفاقی دارالحکومت اسلام آباد کے علاقے گولڑہ میں مبینہ پولیس مقابلے میں ایک شخص جاں بحق ہوگیا۔ اہلخانہ نے پولیس مقابلے میں نوجوان کی ہلاکت کی تحریری درخواست جمع کرا دی۔ جو مقتول کے سالے کی جانب سے دائر کی گئی ہے۔ درخواست گزار نے بتایا کہ بہنوئی ڈیری فارم سے وابستہ تھا اور دودھ فروش تھا۔ وہ گزشتہ رات ملازم کے ساتھ سری نگرہائی وے پر گیا، جہاں پولیس اہلکاروں نے اس پر فائرنگ کردی۔ درخواست گزار کی جانب سے کہا گیا کہ پولیس کی جانب سے پہلا فائر کیا گیا تو نبیل نے اہلکاروں کو چیخ کربتایا کہ ہم ڈاکو نہیں ہیں، مگر اہلکاروں نے ایک نہ سنی اور فائرنگ جاری رکھی، میڈیکل رپورٹ کے مطابق نبیل کے پیٹ میں گولیاں لگیں، جس کی وجہ سے اس کی موت واقع ہوئی ہے۔ اہل خانہ نے نبیل کی لاش کے ہمراہ سری نگر ہائی وے پر احتجاج کیا اور واقعے میں ملوث اہلکاروں کو کیفرکردار تک پہنچانے کا مطالبہ کیا ہے۔ آخری خبریں آنے تک لواحقین نے اعلان کیا ہے کہ وہ کاروائی کا آغاز ہونے تک مقتول کی تدفین نہیں کریں گے۔