اب کے تجدید وفا کا امکان نہیں شاعر احمد فراز

 

اب کے تجدید وفا کا امکان نہیں

                                              شاعر احمد فراز

احمد فراز کے شاعری مجموعے جاناں جاناں سے انتخاب

اب کے تجدید وفا کا نہیں امکاں جاناں

یاد کیا تجھ کو دلائیں تیرا پیماں جاناں

یونہی موسم کی ادا دیکھ کے یاد آیا ہے

کس قدر جلد بدل جاتے ہیں انساں جاناں

 

زندگی تیری عطائ تھی سو تیرے نام کی ہے

ہم نےجیسے بھی بسر کی تیرا احساں جاناں

 

دل یہ کہتا ہے کہ شاید ہو افسردہ تو بھی

دل کی کیا بات کریں دل تو ہے ناداں جاناں

 

اول اول کی محبت کے نشے یاد تو کر

بے پئیے بھی تیرا چہرہ تھا گلستاں جاناں

 

آخر آخر تو یہ عالم ہے کہ اب ہوش نہیں

رگ مینا سلگ اٹھی کہ رگ جاں جاناں

 

مدتوں سے یہی عالم نہ توقع نہ امید

دل پکارے ہی چلا جاتا ہے جاںاں جاناں

 

ہم بھی کیا سادہ تھے ہم نے بھی سمجھ رکھا تھا

غم دوراں سے جدا ہے غم جاناں جاناں

 

اب کے کچھ ایسی سجی محفل یاراں جاناں

سربہ زانو تو ہے کوئی سربے گریباں جاناں

 

ہرکوئی اپنی ہی آواز سے کانپ اٹھتا ہے

ہر کوئی اپنے ہی سائے سے ہراساں جاناں

 

جس کو دیکھو وہی زنجیر بپا لگتا ہے

شہر کا شہر ہوا داخل زنداں جاناں

 

اب تیراذکر بھی شاید ہی غزل میں آئے

اور سے اور ہوئے درد کے عنواں جاناں

 

ہم کہ روٹھی ہوئی رت کو بھی منا لیتے تھے

ہم نے دیکھا نہ تھا موسم ہجراں جاناں

 

ہوش آیا سبھی خواب تھے ریزہ ریزہ

جیسے اڑتے ہوئے اوراق پریشاں جاناں