لوگوں کو خودکشی کرنے اور بھیک مانگنے پر مجبور کیا جارہا ہے، رضا ربانی

 

 

 

 

لوگوں کو خودکشی کرنے اور بھیک مانگنے پر مجبور کیا جارہا ہے، رضا ربانی

حکومت عالمی مارکیٹ میں تیل کی قیمتوں میں اضافہ کے پیچھے نہ چھپے

پاکستان پیپلزپارٹی کے رہنما میاں رضا ربانی نے کہا ہے کہ حکومت پٹرول کی قیمتوں میں اضافہ فوری واپس لے۔ اپنے بیان میں میاں رضا ربانی کا کہنا تھا کہ حکومت عالمی مارکیٹ میں تیل کی قیمتوں میں اضافہ کے پیچھے نہ چھپے، حکومت نے آئی ایم ایف سے معاہدہ کیا ہے کہ وہ پٹرولیم مصنوعات پر لیوی میں اضافہ کریں گے۔ میاں رضا ربانی کا مزید کہنا تھا کہ پٹرول کی قیمت میں اضافہ آئی ایم ایف کی وجہ سے ہوا ہے جبکہ اس اضافے سے اشیاء ضروریہ کی قیمتیں بڑھیں گی اور مہنگائی آسمان کو پہنچ جائے گی۔ سابق چئیرمین سیینٹ نے کہا ہے کہ حکومت نے دو روز قبل بجلی کی قیمت بڑھائی، ایسا آئی ایم ایف کے کہنے پر ہی کیا گیا۔ بجلی اور تیل کی قیمتوں میں اضافہ نے محنت کش طبقہ کا گزارہ مشکل کردیا ہے۔ میاں رضا ربانی نے کہا کہ حکومت کو متنبہ کرنا چاہتا ہوں کہ جب لوگ معاشی بدحالی کا شکار ہوت ہیں تو انارکی کے دروازے کھلتے ہیں پھر بغیر کسی قیادت کے ایسی تحریکیں جنم لیتی ہیں جو ریاست اور ریاستی ڈھانچے کے لئے تباہ کن ہوتی ہیں۔ انہوں نے مزید کہا کہ محنت کش طبقے کے لئے موٹرسائیکل میں تیل ڈلوانا مشکل ہوگیا ہے لوگوں کو خودکشی کرنے اور بھیک مانگنے پر مجبور کیا جارہا ہے۔