شہباز شریف راتوں رات ملک سے فرار کیوں ہو رہے ہیں؟

شہبازشریف راتوں رات ملک سے فرار کیوں ہورہے ہیں

اپوزیشن کے پاس عوامی ترقی کا کوئی ایجنڈا ہے اور نہ ہی کوئی حکمت عملی

ملتان میں وفاقی پارلیمانی سیکرٹری خزانہ مخدوم ذادہ زین حسین قریشی نے کہا ہے کہ اپوزیشن انتشار کی سیاست کررہی ہے، انتشار کی سیاست کبھی بھی کامیاب نہیں ہوتی، اپوزیشن کے پاس عوامی ترقی کا کوئی ایجنڈا ہے اور نہ کوئی حکمت عملی، شہباز شریف راتوں رات ملک سے فرار کیوں ہورہے ہیں، تین دفعہ وزارت اعلیٰ پر فائز رہنے والے اور پنجاب میں صحت کا جال بچھانے کا دعوی کرنے والے کا پنجاب میں علاج ممکن نہیں ، ن لیگ کے قول وفعل میں تضاد ہے، ان خیالات کا اظہار انہوں نے گزشتہ دنوں این اے ایک سو ستاون کی مختلف یونین کونسلوں کے دورہ کے دوران وفود سے ملاقات اور ترقیاتی کاموں کا جائزہ لیتے ہوئے کیا، انہوں نےکہا کہ حکومت عوام کو بنیادی سہولیات زندگی کی فراہمی کے ایجنڈے پر عمل پیرا ہے۔ اور انشاء اللہ اچھا وقت آنے والا ہے۔ اپوزیشن سے ملکی ترقی اور حکومت کی عوام دوست پالیسیاں ہضم نہیں ہورہی ہیں، اسی وجہ سے وہ ملکی ترقی کے خلاف سازشیں کررہے ہیں، انہوں نے کہا وزیر اعظم عمران خان کی جدوجہد کرپٹ عناصر کے خلاف ہے، ان تمام چوروں کے احتساب کا مینڈیٹ عوام نے دیا ہوا ہے، تحریک انصاف کی حکومت اور وزیراعظم عمران خان عوامی مینڈیٹ کے مطابق درست سمت میں چل رہے ہیں۔

مخدوم ذادہ زین قریشی کا مزید کہنا تھا کہ کرپشن کے خاتمے لئے زیروٹالرنس کی پالیسی پرعمل پیرا ہیں۔ ملکی تاریخ میں پہلی دفعہ بڑے لٹیروں پر ہاتھ ڈالا گیا ہے۔ ماضی میں اس قسم کی کوئی مثال نہیں ملتی۔ 

انہوں نے کہا کہ جنوبی پنجاب کی ترقی حکومت کی اولین ترجیع ہے، وزیراعظم پاکستان نے اپنے دورہ ملتان کے دوران جنوبی پنجاب کے لئے ایک بہت بڑے ترقیاتی پیکج کا اعلان کیا ہے۔ جس کی تکمیل سے یہاں کے باسیوں کو نہ صرف قومی ترقی کے دھارے میں شامل ہونے کا موقع ملے گا بلکہ ان کی زندگی میں بھی تبدیلی آئے گی۔ 

مخدوم زین قریشی کا مزید کہنا تھا کہ ماضی میں یہاں کی عوام کے ساتھ سوتیلوں والا سلوک کیا گیا، جان بوجھ کر ان کو پسماندہ رکھا گیا۔ اب ایسا نہیں ہوگا۔ یہاں کے نوجوانوں کے لئے ملازمتوں کا کوٹہ جنوبی پنجاب کے نوجوانوں کے لئے ایک بہت بڑا تحفہ ہے، گزشتہ ستر سالوں سے کسی حکومت نے یہاں کے نوجوانوں کے لئے ملازمتوں میں علیحدہ کوٹے کا نہیں سوچا۔ 

جنوبی پنجاب میں ترقیاتی کاموں کا جال بچھا دیں گے، یہاں کے فنڈز صرف اورصرف یہاں پرہی خرچ ہونگے۔ وفاقی پارلیمانی سیکرٹری خزانہ مخدم ذادزین حسین قریشی کا این اے ایک سو ستاون کی مختلف یونین کونسلوں کو بھی دورہ کیا۔ جہاں انہوں نے وفات پاجانے والی شخصیات کی رہائش گاہوں پرجاکر فاتحہ خوانی کی اور مرحومین کے درجات کی بلندی کے لئے دُعا کی۔ 

 یونین کونسلوں کے دورہ کے دوران انہوں نے ترقیاتی منصوبوں پر کام کی رفتار کا جائزہ لیا۔ اس موقع پر چئیرمین ایم ڈی رانا عبدالجبار ، قیصر بھٹہ، شفیق آرائیں، رانا افضل اور دیگر شخصیات ان کے ہمراہ تھیں۔